UNIVERSITÄTSBIBLIOTHEK SALZBURG
Handschrift M I 29 (Fechtbuch)
(137r-141r) Meister Martin Hundfeld: Fechtlehre mit dem kurzen Schwert
(137r) Hie heb sich an das kürtz swert in dem kanpff als es meinster Mertein Hündsfelder gesait hatt
Item nu (!) das swertt by der rechten hant by dem beyn und mit der lincken griff untten in die clingen und ge vast zu dem man, So müß er schlagen oder stechen, do kum vor und biß rechs pleyb sollichenn und griff nohenn.
Das erst stuck
Item Stich Im Inwendig zu synen gesicht, wirt er dir daß, So far durch und setz im an außwendig an sin gesicht, wirtt er daß furbaß und stichet dir den ort ab, so wind mit dinem knopff in uber sin rechte achsell und spring mit dinem rechten peyn hinder sin linckes und wurff in uber ruck.
Ein bruch
Item Wer dir daß thut und hat dir den knaupff an den hals geworffen, so far mit diner lincken hant von unten auff zwischen sinen peyden armen und schwing dich dan von Im auff din rechten siten und wurff yn uber die hueff.
Item Wan er dir den knopff umb den hals will werffen, So griff mit der lincken hant von dir und griff unter sin rechte hant an daß pyntt und an den knapff und züch den under sich und setz ym an mit dynem schwertt wo du willt.
(137v) Item wen er dir den knaupff begriffen hat, So wind mit dinem knaupff von unden auff außwendig umb sin lincke hant und schub mit dinem rechten pyn fursich und stoß in mit diner clingen an sin lincken arm.
Das ander stueck
Item Stich yn uber den ersten stich inwendig zu sinem gesicht und thün zu dem andern mall als du ym aber zu dem gesichtt stechen wilt, Indes far durch und satz ym uswendig zu sinem gesicht, wen er dir daz werett, so schrit mit dinem rechten peyn hinder sinen lincks und stos yn mit dem gehultz in sin lincke uchschen und stoß inwendig, so felt er.
Item wo er dir daß thutt, so schrit mit dinem lincken peyn hinder dich und vohe den stoß zwüschen din beyde hant in die clingen und wind mit dem knaupff von unden auff zwischen uber sin lincke hant und spring mit dinem lincken peyn hintter sin rechtes und stoß ym beyde swertt uber sin hals so hastu ym den rueck an gewinnen.
Das drytt stuck
Item Stich im aber zu sinem gesicht inwenig und far in den andern und stich ym ußwendig zu sinem gesicht, wirtt er dir daß aber, So schub mit dem lincken peyn zwueschen sin beyde hende und griff mit dinem knaupff außen uber sin linckes peyn in sin knyepug und leg dich mit diner lincken achsell oben fast umb yn und hebe unten fast auff und truck auff sinen lincke sytenn.
(138r) Item Wer dir mit dem knaupff will faren in die knyebug, dem griff mit diner lincken hant hintter sin lincke hant by dem arm und griff mit diner rechten von unten auff ym an den elnbogen und das din finger oben sten, so wuerfftu yn auff daz antlutz.
Die vierde stuck
Item Wen dü ym Inwendig zu dem gesicht stichest und er dir wider, so gang oben auff sin swertt und begriff sin schwertt py der clingen in die hant und setz indeß den ort an unter sin lincke uchsen, wertt er dir daß und begrifft din swertt auch als du das syn hast, so arbeytt auß eyne riessen als hernach geschriben statt.
Das erst reissen
Item Stich Im Inwendig zu sinem gesicht und wind aber mit dem knaupff auff din lincke siten von unden auff uber sin clingen zwischen siner hant, reiss aber vast an dich, stich ym zü synem gemecht, wertt er dir daz und foch dir daz schwert und du daß sin, daz beyd swert gefangen syn, So würff din swert mit dem knaupff ym In sin rechte siten und spring mit dinem rechten peyn under sin linckes und nym den rueck und heb yn hoch auff von der erden und schlag In mit dinem rechten fuß außwendig an an sinen rechten enckel und wurff yn auff sin rechte syten.
Sequitur das ander riessen.
(138v) Das ander reissen
Item Stich ym Inwendig zu dem gesicht, wirtt er dir daz und setz dir den stich ab, So wind mit dinem knaupff von unden auff din lincke siten von oben nider in sin swertz clingen zwischen sin beyden henden und rüßt (?) an dich, So rieß im sin lincke hant von der clingen und stich ym dan zu dem gemecht, ist er dir zü starck, daz du im die hant vom dem swert nit geriessen magst, So wind mit dinem knaupff aber von unden auff, auff din rechte siten uber sin lincke hant und stos yn mit der clingen in sin lincke siten, hauw von dir dan.
Das tritt reissenn
Item Dün im glich als oben geschreben stott und ob beyde swert gefangen wern, So würff ym aber syn knaupff in sin rechte siten und spring mit dinem rechten peyn hinder sin lincke und griff im mit diner rechten hant in syn peyde ars backen und grif mit diner lincken hant von unten auff ym an sin kynbacken und zuch unden an dich und stos oben von dir, so felt er an den rueck.
Der vierde bruch
Item Wer dir mit der lincken hant fert under din kynbacken und nympt dich mit diner rechten hant pey dem lincken arsbacken und wil dich uber rueck werffen, So griff mit diner lincken hant ym auff sin lincke und griff in by den fingern und prich ym die hant auff din lincke siten und var mit diner rechten hant an sin lincken elnbogen und nym ym daz gewiechtt.
(139r) Daß vierd reyssen
Item Ist aber das peyd schwertt gefangen sin, würff ym aber din knaupff in sin rechte siten und spring ym mit dinem rechten peyn hintter sin linckes und begriff yn mit diner lincken hant pey dem arm und griff mit diner rechten hant yn bey sinem elnbogen und nym Im daß gewiecht.
Das fünfft reyssenn
Item Wan er din swertt gefangen hat und du daz sin, so ge durch beyde swert auff din lincke siten, so gewinestü ym sin swert auß daz ers dir also loßen müß, behelt er dan sin swertt und lest dir daz din, So tün sam dü ym zu dem gemecht stechen wolst, wertt er dir daz und griff mit siner lincken hant noch dem swertt, So stich unten durch durch sin swert auff sin siten ym uber sin rechten arm an sin rechte prust, So prichstu ym sin swert auß siner hant, So wurff sin swert mit dem ortt gegen ym und mit dinem swertt vall in die obern huett.
Ein bruch
Item Wer dir daz thuett und dir dürch peyden swertt lauffen will, Stoß ym beyde swertt uber den hals und mach die scher.
Ein wider brüch
Item Wer dir die scher hat gemacht, so griff mit diner rechten hant von untten auff hintter sin rechten in daß peyn, daß den negell und den fingern (139v) oben sten und würff den din swertt fast von dir auff din lincke siten und ker dich gegen ym, auch auff din lincke siten und wend mit dinem knopff aussen uber sin rechte hant und schlag yn mit dem knaupff und mit dem gehultz, wo dü willtt.
Das sechst reyssenn
Item Wen die schwertt beyd gefangen sint, so wurff den knoupff fast von dir auff dine rechte siten und auff sin lincke siten und spring mit dinem rechten peyn hinter sein linckes und griff mit diner hant von unten auff ym In sein rechte uchsen und heb mit dinem swertt uber sich, So wurfftu yn auff sein rechte syten, daz ist daz best und daz lest under den reyssen.
Das ist ein stück
Item Sticht dir eyner zu dem gemecht, so stich ym auch zu dem gemecht einen stich, den andern stich von oben nider auff sin lincke hant zwischen sein beyden armen und wind mit dem knopff von unten auff yn sin rechte siten, Schrit mit dinem rechten peyn hinter sin linckes und wurff in uber die rueck.
Ein brüch
Item wer dir thutt so loß din swertt gen pey der clingen und begriff mit diner lincken hant hinten uber sin schultern und begriff din swert wider by der clingen und druck yn vast zu dir und schwing dich von ym auff din rechten sytenn.
(140r) Ein stueck
Item Arbeyt er mit dir hoch und stich dir zu dem gesicht, so stich von unten auss zwischen sinen beyden armen und uber sin lincke achsell, begriff ym mit diner hant hintter seyne lincke und wurff din schwert mit dem pyntt auff din lincke achsell und griff mit diner rechten ym yn sin rechten elnbogen, stoß vast von unten auff und nim daz gewichtt, so plybt daz swert under seynem lincken arm zwüschen uwer peyden.
Aber ein stück
Item Arbeit er aber hoch mit dir, so stich aber unten auff zwuschen sinen beyden armen und loß din lincke hant varn von der clingen und griff oben zu uber din swertt riesch und begriff din swert wider by der clingen und stos ym beyde swertt ube den hals hinten uber sin ruck gar ab hyn yn sein beyd knyebug und reiß vast untten an dich und mit dem haupt stoß vast vob dir, so wurfftu yn auff den ruck.
Ein bruch dar wider
Item Wer dir daz thün will und will dir die beyde swert uber den hals stoßen, so far mit diner rechtenn hant in sein lincke siten uber sin ruck und schrit mit dinem rechten peyn vorn fur sein linckes peyn und würff yn uber die hueff, der bruch gett zu beyden siten zuo.
(140v) Ein stueck
Item Stich ym Inwendig zu dem gesicht und begriff dan syn swert pey der clingen zu deinem swertt in din lincke hant und windt mit dinem knaupff von unten auff uber sin rechte hant und heb dan vast uber sich und reiß den auff din rechte siten, So blytt dir din swert auff dem rechten arm, das ist daz swert nemen,
Aber ein stueck
Item Wan dü ym yn lauffest, so stich ym ußwendig zuo sinem gesicht und griff mit dyner lincken hant ym zwuschen sin [durchgestrichen: peyn] peyd hend in sin swertz clingen und loß dan din swert vallen und griff mit diner rechten hant hintter sin rechte auch in syn swert clingen und druck mit diner rechten hant sein swert vast zu dir in din rechte syten, So griff dan mit diner lincken hant von oben nyder zwischen sin beyde arm, sy nympstu Im daz schwert.
Ein wider brüch
Item Wer dur daß thutt und dir daz swert will nemen und auß winden will [nym?] mit dyner rechten hant sin rechte und mit dyner hintter sin rechten elnbogen, So gewinstu Im den ruck ann.
Aber ein stuck
Item Wan ir beyde umb ey swert (!) umb ein schwert kryegt, So tracht daz dü habpst din lincke hant hintter (141r) syner rechten in synem byndt und din rechte hantt zwueschen seinen beyden henden in syns schwerts clingen, So begriff yn dan mit dyner lincken hant yn syne rechte und griff dan mit dyner rechten von unten auff sein rechten arm und schrytt myt dynem rechten peyn hynder synen lynckes, zueck er das pein hinder sich, so schrytt zwueschen syn beyde peyn und stos yn dan syn arm mit diner lincken hant von dir auff din lincke sytenn und zuch yn nit der rechten syn rechten arm vast an dich und ein wenig uber sich uff din rechte sytenn.
Finis.
In vigilia Maria Magdaglena (sic) 1491.
(141v-142v) leer.