UNIVERSITÄTSBIBLIOTHEK SALZBURG

Handschrift M I 29 (Fechtbuch)

[! In Arbeit!]

(46r-117r) Hans Lecküchner: Messerfechtlehre

(46r) [O]b du wilt achten

Messer vechten betrachten

So lern ding daz dich ziert

Zue schimpff zue ernst hoffiert

Do mit du erschreckest

Und die meinster kuenstlich erweckest

Hie hebt sich an die vorred im messer und saget wer will leren vechten im messer daß er sol leren recht kunst und sich geben uff disse artt und kunst, so mag er wil besten mit erchter kunst vor fursten und vor hern. Im sol billicher siner kunst baß gelonett werden dan andern meinstern die deß dings nit wissen und sich nit kunden schicken, wan eß sint viel meinster deß schwertz die nit wissen von der art deß messers noch recht ußzenden (?) mugen, wer sich in disse ding und art schicken kan, der vint viel ernstlicher stueck, do mit er die meinster wol mag uff wecken und kunstlich beschliessen, daß sie sich an dancken schlagen stoßen furen werffen halten muessen losßen etc.

Sequitur textus

(46v) Wer mir versetz

Mit allen kuensten wurt er geletz

So nu der meinster gendet hat die vorred, Nu git er dir eyn gutten lere, die verste also: wan du mit dem zuevehten zue dem man kumpst, So soltu nit stil stan mit dinen messer und sienen (sic) hauwen noch warten, wan die vechter die nuer wellen versetzen, die werdent sere geschlagen dan die wiell sie versetzen, mogen sie keyn rechtt kunst triben und so sie anders nit thuen wellen dan versetzen und uff ander luet schleg und arbeit wollen sehen, So werdent sie geschlagen und geschmecht by allen Iren kuensten etc.

Indes vor und noch die wort

Sin aller kuenst ein hort

Schwech und sterck prieff wißlich

Ob du wilt vechten kuenstlich

Hie saget der meinster und meldett den gruent des messers vechten und sprichtt Indeß vor und noch etc. daß soltu also verstan, daß du du vor allen dingen recht vernemen solt die zwey ding, daz ist vor und noch und die schwech und sterck und daß wort indeß wan darueß kuemptt aller gruntt aller der kunst deß messers vechtens und (47r) wen du die ding recht vernyempst und verstoest und zue vor an daß wortt Indes nit vergist In allen stuecken die du triben bist (!), So magstu wol eyn guetter meinster deß messers sin und magst fuersten und heren leren daz sie mit rechter kuenst woll besten In schymff und In ernst.

Das vor

Item daß vor ist so du erkuempst mit dem hauw dan er daß er dir versetzen mueß, So arbeytt Indes behendeglich mit dem messer fur dich und loß in darnoch zu keyner arbeytt kuemen, also hastu Im an gewuenden daß vor.

Daß noch

Item wan er E kuempt mit dem hauw den du und im das versetzen muest, So arbeytt indeß behendeglich mit dem messer oder suenst mit stuecken, So nyembstu im daß vor mit dem noch und das heist das vor und das noch.

schvech (sic) und sterck

Item du solt auch vor allen dingen wissen die schwech und sterck des messers. Nu merck von dem gehultz biesß an die mitte des messers das ist die sterck, Und von der mit biß an das ortt, das ist die schwech und wie du dar uß vechten solt, daß findest her noch geschreben und waß das wort Indes ist etc.

Sechs heuw lere

Aus eyner hant wider die were

(47v) Die linck hant leg uff den rucken

Uff die prust wiltu verzucken

Hie lert der meinster wie man sich schuecken sol in dem vechten deß messers und wie man sich darin schuecken sol und zuem ersten soltu mit eyner hant fechten mit dem messer und die ander uff dem ruecken halten. Ob du aber willt mit lerer hant vechten als mit messer nemen, uber grieffen, arm beschlueßen etc. So soltu die hant von dem rueck uff die bruest wenden, waß du wiltt Inwendig uber den arm triben.

Item zu dem andern: So werdent im text Sechs verborgen hauw gemelt und beruerett auß dem kuemen vil guetter stueck. Were sie recht trieben kan und In die wiße kunstlich sich zu schicken und wie du sie triben solt mit triehen stuecken, daß wierstu hernach enttruechtt  etc.

Zorn hauw, wecker hauw,

Entruest, hat zwinger,

Gefer, mit wincker

Hie nennet der meinster die sechs verborgen hauw, wie sie heissent mit namen uff daß du die stueck aller bast vernemen magst und sprichtt daß der erst heist der zorn hauw, der ander der wecker, der trett entruesch hauw, der vierd der zwinger, der fuenfft der gefere hauw und der sechst der wincker, daß sint sechs stueck als du hernoch horen wuerst.

Sequitur textus

(48r) Die pastey, versetz,

Noch rieß, uberlauff, absetz,

Den wechsel, durch zuck, lauff durch,

die ab schnit, druck, ablauff, benym,

durch ge, pogen, die wer nimb, heng,

die wind, gen plossen, schlag, die streich, ler verdressen

Hie zelt der meinster die andern haubt stueck der sint sieben zehen, daß erst das sint die vier leger, die werdent berurett do der text spricht die pastey.

Item daß ander stueck heist das versetzen, das wuertt beruerett so der text spricht versetz.

Item daß dritt syndt daz noch reissen, das wirtt bereiret (sic) so der text sprich noch reiß.

Item daß vierd sint die uber lauffen, daz wurt beruerett do der text sprichtt uber lauff.

Item daß funfft sint die ab setzen, daz wurt beruret do der text sprichtt absetz.

Item daß sechst daß sint die duerch wechschell, daß wuertt beruerett so der text spricht wechschell durch.

Item die siebende heist daz zuecken, daz wuertt beruerett so der sprichtt zueck.

Item daß acht sint die duerch lauffen, daz ist so er spricht lauff durch etc.

Item daß Nunde sint die ab schniden oder die vier schnit, daz wuert berueret so gesprochen wuerde ab schnide etc.

(48v) Item daß zehende heist die hend drueck daz wuertt so er spricht druck.

Item daß elfte sind die ab lauffen, daz wurt beruerett so er sprichtt ab lauff.

Item daß zwelffte sint die benemen, daz wuertt berueret so der text spricht benym.

Item daß xiii daß sint die duerch gen, daz wuertt so er sprichtt durch ge.

Item daß xiiii sint die bogen, daz wurt so er spricht bogen.

Item daß xv heist daz messer nemen, daz ist so er sprichtt were nym.

Item das xvi daß [sint] die hengen, daz ist so er sprichtt hengen.

Item daz xvii sint die wenden im messer, So er spricht wende gegen den plossen, also hastu daz der haubt stueck sintt dryundzwentzig.

Was uff dich wurt gericht

Zorn hauw ortt daz gar bricht

Wiltu in beschemen

Am messer ler ab nemen

So der meinster des messer vechten in die stueck geteilt hatt und eyn yttlichs mit namen genant hatt, Nu hebt er an zue sagen von dem ersten glyett der teyllung als von dem zorn hauw.

Item den tribe also: wan er von der rechten syten oben zue dem koppff schlecht, So hauw von diner rechten syten auch von oben mit Im zorniclichen glich an al versatzung (49r) oben In, Indeß loß den ortt fur In schuessen Im zue dem gesiecht oder brust und wend indes din messer gegen dem sinen daz die lang schnide oben ste und die kurtz untten, wuertt er daz ortt gewar, so wende wider uff sin lincken siten den ort zu dem gesicht, daz euechling die lange schnid oben ste, wurtt er dez ortz geware, si rieß im messer uff an das messers clingen wider von sinen messer und hauw im von zu der andern siten zu dem kopff, daz heist ab genomen Im messer etc.

Ein anders

Item hautt er von siner rechten achsell, So hauw auch zorniclich glich mit Im In und wend den ortt zu dem gesicht gegen sinen messer, daz die recht schnid oben ste, wurtt er daz stichs gewar, So loß den ortt Indes unten sencken und far zwueschen dich und Im do mit gesencktem ortt uff und hauw im zue der rechten siten oben zu dem kopff mit der langen schniden.

Ein anders

Item nympt dir eyner ab am messer, So wind din messer mit dem rueck dines messers anwenig auff daz sin und hauw im oben noch der ploß, so schlechstu In duerch den kopff.

Item eyn ander bruch wider die ab nemen, Indes so er ab neympt, So drett besitz uß dem hauw oder schlag und arbeytt im zu der nesten ploß mit dem hauw.

Item eyn ander bruch, Indeß so er ab nympt, Stich im zue dem gesichtt etc.

Tex (!)

Hauw, stich, merck

Im band weich oder hert

(49v) Vor, und nocht, indes, hab acht

Die leuff des kriegs recht betracht

So nuen der meinster von dem ersten stueck hat gesaget als von dem zorn hauw, Nu saget er eyn gut lere daz ist wan eyner mit dir zue hauwt oder sticht, So soltu eben mercken wan eyn messer an daß ander glitz, ob er Im bandt wiechtt oder hart ist und als bald du daß entpfindest, So arbeytt Indes mit dem kryeg noch der weich und noch der hartt zu der nesten ploß. Wiß wan du mit dem kryeg recht arbeyten kanst und den rechtt fuerest, So kan er dir hart engen, du machst im arebeit machen daz er kum von dir ungeschlagen kumen mag und waß daz vor und daz noch ist, daz hastu vor gehortt und waß der krieg ist, wuerstu hernoch entrichtt etc.

Den krieg uff los

Oben, nider, wart der plos

Hie saget der meinster waß der krieg und waß man daruß triben sol zu den fuer