UNIVERSITÄTSBIBLIOTHEK SALZBURG

Handschrift M I 29 (Fechtbuch)

(130r-136v) Meister Lew: Fechtlehre zu Fuß

Item hie hebet sich an meinster Luowen künst fechtes yn harnisch auß den vier huten zu fuß und zu kanff

Wer ab synnet

fechtes zu fuß begynnet

der schiß sin sper

zu ytlichem an heben recht were

Nym den vor stich an forth spring und setz ym an

zueck das gesicht ym ann

Wiltu vor stechenn

Mit zueckenn wer ler prechen

Mer wil er ziehenn

Von scheiden wil fliehenn

So solt im nohenn

Und weißlichenn wart des fohenn

(130v) Die erst huott

Item Nym din schwertt In beyde hende und schutt daß krefftiglichen und kum in den hangendenn ortt zu dem rechten or und stich ym zu dem gesicht oder wo das ist, wertt ers so zuck und gee durch mit dem stich und setz im an hals und wenn du hast Im an gesetz, so schlag din schwertt unter den rechten uchsenn und tring In also vor dir hynn.

Item Ein anders. Stich im zu dem halß als vor, wertt ers mit dem vordern ortt von siner lincken hant und setz ab so fal im mit der lincken hant an sin schwertt by dem ortt und wieß im den stich ab, und stich ym mit der rechten hant krefftiglichenn zu den hodenn, wurtt er des stichs gewar und valt dir auch in das schwertt, So loß im din schwertt fur die fuß vallenn und foch oder begriff den selben arm und brich yn ym als du dan woll weyßtt.

Item Ein anders. Auch machstu auß der obern hutt Mit dem knopff des schwertes ym zu dem haupt schlagenn oder auff die arm bug des vorderenn fusses, und will er dir daz weren wen du ym schlechst noch den dem kniebogenn und wil dich obenn uber lauffenn, so versetz Im den schlag mit dem gehultz ab und setz Im den ort in sin gesicht.

Item was man mit dem knauff schlecht daz heissent (131r) die dünder schleg du ein auch under die ougenn schlagenn in daß visier.

Item merck wiltu eynenn uber danck in dem kreiß umb furen, so griff noch eynem finger zu der lincken hant und brich ubersich oder stich ym obenn zu dem hantschuch in die hant uber sich und fur In auß dem kreiß, daz ist gut und auch vorborgen.

Item wiltu eynen man werffenn der dir hat an gesetz, so uber griff mit der lincken hant uber sin lincke und nym daß gewiechtt pey synem lincken elnbogen.

Item wider daß wan er griffen will so prich im die hant vorn by dem glitt mit dem schwertt.

Die ander huot

Item Nym daß schwert in beidenn hend und halt es uber dyn knye und gee zu dem man, Sticht er dir unten zu, wind im nicht, Sunder setz ym an sin gesicht.

Item sticht er obenn zu es sy zu dem gesicht oder wo es sy, daß soltu werenn und setz ym den stich ab mit dem vordern teill dines schwertes und setz Im In daß gesicht oder in den druessell und schlag din swertt unter dyn uchßenn und dring vor dich.

Item Oder setz ab zwuschen dinen byden henden und far ym mit dem knopff umb sin hals und vor setz ym mit dynem rechten fuß und fell in also.

(131v) Ein bruch

Item Nym daß arms war und drytt umb und tribe den arm bruch.

Item Aber far uber mit der hantt uber syn vor gesetzen hant und zuch In zu dir und brich und setz Im ann.

Item oder wechsell [durchgestrichen: unten] durch und setz ab mit dem kloßem.

Ein bruch

Item brich daz. Nym des kloßes war mit der lincken hant und stos ym daz swertt in den ruckenn und stich Im unden zu den hodenn.

Die dritt huott

Item Nym daz swertt in bede hende und ste in dem gehenck by der rechten sytenn Also das der linck fuß fur stee und genere uff dich stichett oder wolt schlagen mit dem kloß oder will dir an setzen, so stich im zu syner versatzung in die hant.

Item oder stich uber sin hant duech und uber sin swertt und druck den knopff zu der erdenn und setz Im an.

Item nym und schlag mit dem knopff zu dem vor gesatzttem elnbogenn.

Item oder schlag Im unden zu den elnbogenn und daz swert wider gefast by der klyngem und under (132r) der gerechten uchsenn oder uff daz knye.

Item felt er dir in daz swertt in der mitten, das geschicht gern von zagheitt, so rausch [durchgestrichen: auch] auff.

Item felt er dir in die spitzenn, so hab daz swertt uber daß haupt und nym daz schwertt in beyde hende und zück an dich und schlag In zu der vordern hant, die er hat fier gesetz oder zu der knyepug und griff wider daz schwertt mit der clingem und geleg uff daß knye.

Die vierde huot

Item Nym das schwertt unter die rechten uchsen und ge an den man mit an setzen und setz ym an daß gesicht, wertt ers, so ruck oder setz ym an den dryssel oder an die achssell oder under die uchsen und dring yn also von dir hyn und wenn du hast an gesetzett so loß yn nicht ab kummenn, so mag er weder geschlagenn noch gestechen wan es wirtt ym zuo kurtz und daz ist die künst, daß wisse.

Item merck, alles daß du willt ansetzen daß setz in das gesicht oder an den druessel oder an die lincke achsell oder unten an die uchsenn und alweg unter die die rechten uchsenn und dring In also vor dir hin wegtt.

(132v) Nota

Item Merck eben, setz du Im an die rechte sytenn so tritt so trit (!) ab mit dem lincken fuß oder setz du Im an den lincken siten, So tritt ab mit dem rechten fuß und lauff fier dich und truck In uff ein siten und lest er die siten, so stos in uff die hauben, wis daß ist das krenckest an dem menschen.

Item Merck wen du Im hast an gesetz und ist er lenger dan du, So truck also glich fur dich hin daz der ort uber sich auff gee und In woll in die ringenn gesetz.

Nota

Item Und ist er kurtzer dan du, So loß din swertt mit der hant ab sincken bis auff die rechte hueff, und also far uber sich uff mit dem ortt und under die ring wol gesatz als vor und loß in nicht ab kümen und wil er dan mit dem kloß arbeyten, so merck daz noch volgenn mit dem ortt, So kan er zu keynem andern kümen und ist gutt.

Ein bruch wider die ansetzüng

Item Merck wider daß ansetzüng In das gesicht oder wuer daß sye, daß brich also: Stich in unten in die hant die er hat vor gesetz auff die clingen und fier In also auß dem kreyß.

(133r) Item Oder stich In uber seyn vor gesatzten hantt und druck daz swert und den knopff nyder zu der erden und setz Im ann.

Item Oder setz Im ab zwischen dynen beydenn henden mit dem knopff gestossen fur den hals und unten mit dem rechten peyn getretten hinter syn linkes und dan uber geworffen.

Item oder setz Im ab mit dem ort und Im angesetz an sin gesichtt.

Item oder durch wechsell mit dem knopff und setz Im do mit ab.

Item Ob er die hant hatt umb gewantt auff des clingen, stich ym oben in die finger ubersich auff.

Ein bruch wider die ansetzüng

Item wider daß an setzenn Stich Im untenn durch sint (!) hant und uber sin swertt und schlag den knauff uber sin lincke hant und druck do mit nider und setz Im ann.

Item wen dir eyner mit dem knaüff under den hals faren [wil] uber din rechte achsell, So begriff Im den elnbogen mit diner lincken hant und stos In von dir und stich mit der rechten hantt krefftliglichenn hinden zu.

(133v) Item Oder begriff mit der rechten hant und mit der lincken nym daz gewicht by seynem enlbogenn (sic).

Nota

Item Rück in zü dir mit syner rechten hantt und begriff im den lyp und gewind im die syten an und erheb Im und schlag im unden auß sin fuß, so felt er, daz ist gutt.

Item wan er sticht, so stich mit Im glich zu siner lincken syten und begriff syn swertt zu dinem swertt mit der linckenn hant und mit der rechten var untenn durch sin swertt und schlag dan mit beyden swertternn.

Item wen dir eyner hat an gesetz und du Im auch, das prich also: nohent Im als mit eynem ringen mit der siten an dir und er dir hat angesetz und grifft mit diner lincken hant vorn an sin swertt, sin ort ruck yn noch dir, so gewinstu im die siten an.

Item stichstu eynem zu dem gesicht auß der andern hutt von der rechten siten und felt dir in din swertt als vor geschriben stot mit siner lincken hantt vor dine lincken, So far auff mit der rechten hant und mit der lincken hant leütt im sin schwertt auff uber sin lincken hant ab und setz Im an.

(134r) Item wiß das alle ober an setzung prechent und ledigen die andern und in allen an setzen soltu den knouff winden under dem rechten uchsen in die hut und also fier dich dringen mit sterck.

Item Stichstu eynen zu dem gesicht auß der obern hut und felt er dir mit siner lincken hantt in din swertt schwueschen dinen beyden henden, so wind mit dem knouff Inwendig durch sinen arm auff deine lincke siten und ruck uber sich auff din rechte siten und setz Im ann.

Nota

Item Stichstu eynem zu dem gesicht aus der untern hutt von der rechten siten und er felt dir mit syner lincken hant in din swert zwischen dynen beyden henden, So wind mit dinem knopff aussen uber sinen lincken arm und setz im an, daz heisset außgezempt unten und oben.

Item wan du eynen hast [durchgestrichen: gefast] angesetz und er starck wider ist daz du In nit getringen magst und er grifft unden durch sin swertt mit seiner lincken hant und begrifft der din lincken und wil dir daz gewicht nemen und die weill den arm reyttert, die wil setz Im an unden an die lincken uchsen, so gewinstu im die schwech an wie starck er ist, daz hilfft in nitt.

(134v) Item stich mit eynem glich yn auß der untern hutt von diner rechten siten und biß starck am swertt und ist er auch starck, So far mit dem knopff uber sich auff mit der rechten hant und mit der lincken hant leütt ym den ortt uber sin lincken arm an die brust oder unter sin lincken uchsen und setz ym an und wind aweg an mit dem ansatz under die uchsenn in die hutten.

Item das sint die unter hauwenn und die auff sten ym kampff

Item Wan er felt, So fall mit ym aweg zu der rechten siten und mit dem rechten knye fal ym aweg zwichsten (sic) sin peyn und mit der lincken hant far umb sin halls und bis nicht zu geehen daz du nit zu ver uber in vassest und griff noch sinem degenn und zuch dinen tegen nicht, du hapst in dan gewiß, wil er dir dan in din degen fallen, so stich ym zu der hant und rueck nicht wyder.

Ein anders hebenn

Item Nym sin rechten arm zwischen dyn beyn und leg dich auff In zwergs und streck dich vast und halt din beyn fast zu samen und griff mit diner lincken hant sinen lincken arm und halt yn also und arbeyt mit der rechten hant mit dem tegenn, daß gett zu beyden siten zu.

(135r) Item Ein anders heben. Wan du neben In fallest, So nym sin hauptt untter sine lincken uchschen und umb fahe in mit dem hals und leg dich mit dem lincken oben untter sin antzlutz und arbeit mit der rechten hant.

Item Ein anders. Felt er auff den ruck so fal im mit dinem rechten beyn zwischen sin beyn und faß im den rechten arm in din lincke knyepogenn und setz dich dar uff und begriff sin lincke hant mit diner rechten oder lincken hant, truck in nider under sin hals und halt in fest mit diner lincken und arbeytt mit de rechten mit dem tegenn.

Item Ein anders. Wurffstu in auff den ruck, so fal im mit dinem lincken knye zu sinem rechten arm und mit der lincken hant fur sin hals und do mit truck vast, begriff im sin lincke hant mit der rechten und begriff mit der lincken der rechten zü hilff und arbeytt mit der rechten.

Item Ein anders. Felt er auff den rück, so begriff im beyde peyn untter dem knye mit beyden henden und heb sie auff und fall ym mit dem knye zwischen sin peyn ynd (sic) die hoden und die halt aso bey dem peyn mit eyner hant und mit der andern arbeit mit dem tegenn.

Item by dem hals mit der lincken fur die kelle.

Item under dem rechten arm durch und uber den hals.

Sequitur.

(135v) Item unter hauw wen er auff den buech felt

Item So fal ym mit dem rechten knye yn das schlos und mit diner lincken hant griff uber sin hant fornen an daß visier und zuch uber sich, und mit dem knye drück wider, ist sin visier offen, so griff mit den fingern in seyn augen oder griff mit beyden henden an die hauben und vor (?) die mit dem hals, so felt er wider auff den buch.

Item Ein anders. Felt er auff den buch, so fal auff sine arm mit dem knye ym gelenck und brich uber sich.

Item wen er auff den buech felt, so sitz auff yn und schrenck uber sin arm und bruch sye.

Item sitz ym auff sin achsell schrittlingen und zuech uber sich.

Item Sin rechte hant auff den ruck woll vor sich getruck.

Die auff sten im kanpff

Item Grifft dir eyner in dyn visier mit den fingern, wan es offen ist von unden auff, wen du auff dem buch leyst, so schlag mit diner hant an seyn lincken.

Oder mit diner rechten hant an seyn rechte hant und ruck an dich und druck din haupt zu der (136r) erden und hilff mit henden und mit fuessen, so kümpstu auff.

Ein stuck auff das

Begriff syn lincke hant mit diner lincken und ruck an dich, fal auff den rück und mit der rechten hant begriff sin beyn und hebe uber sich, so kümpstu auff.

Ob du auff den ruck velst

Item Als du velest, leg dyn lincke hant auff sin brust und wan er auff dich vallett, so griff mit diner lincken hant an sin lincken elnbogen und mit der rechten hant griff untter sin linckes knye und hebe uber sich und mit dem lieb schupff dich risch auff yn den fal, so kümpstu auff y[...]

Ein ander pruch

Oder bring din lincken arm umb sin hals und heb mit dem rechten peyn und hilff mit der rechten.

Item magstu daß nit gethun und er mit dem tegen arbeytt, So schüpff dich aweg außwartz, magstu din lincken arm gewynenn, so griff ym under sin hant untter den tegen und thün (?) die hant zu wen du griffent wiltt und wen du ym die hant gefasset hast, So griff mit der rechten an sin lincken elnbogen und heb uber sich und rueck daz recht knye zü dir und besich ob du ym magst von dir gestossenn.

(136v) Ein gut halten nider ringen

Item Begriff mit diner rechten hant sinen rechten arm hintter siner rechten hant und mit der lincken hant nym ym daß gewichtt by synem rechten elnbogen und stos sinen rechten arm mit diner rechten hant wol uber dinen lincken arm und tritt hinder yn und halt yn vest, hostu yn nit gewurffen, so begriff sin recht peyn hinder dyn knye und wurff yn.

Ein gut lere

Hastu eynen untter dich geworffen, so schind oder reyß ein groß stuck aus sinem waffen rock und stich ym in daß visier mit dem tegen und loß daz ym nicht auß gewynnen, daß ist gut, wenn es kottig oder staubig ist, wirff ym daz visier voll staubs oder gemil oder stich erden auß mit dem tegen und wurff ym daz in daz gesichtt.

Aber ein lere

Merck, magstu keyn ploßling gesten, so schind ym uß dem wappen rock auff den armen oder die hossen und waß du sicht von nestell daz schind auff so vinstu etwas daß dir gut wirtt und sich gar eben auff sin tegen, das er dir do mit nit schade.

Merck du magstu yn auch schlagen mit dem knopff oder stoßen zu dem hertzen wie er lentt oder zu den achsell oder zuo andern gelenckenn.

Merck im dem vorreuten Schlag oben oder unten an sin enckell und zuch oben auff sin sitenn mit der rechten hantt.

Finis.